Powered By Blogger

laugardagur, 31. mars 2012

Páskafrí

Rúnar er kominn í langþráð páskafrí og sá var fljótur að koma sér fyrir í stofunni, beint fyrir framan sjónvarpið. Hann er í útilegu og svona vill hann fá að vera í fríinu. Ég held hann sé kominn með hálft herbergið sitt inn í tjaldið :-) En það fer alla vega vel um drenginn, svo mikið er víst.



sunnudagur, 25. mars 2012

Beltapróf

Í gær, laugardag, var beltapróf hjá Rúnari Atla í karate. Ætli það hafi ekki verið um 50 - 60 krakkar úr þremur skólum borgarinnar sem voru mættir til leiks. Prófið var haldið á sal skólans sem Rúnar er í og því ekki langt fyrir okkur mæðginin að mæta.

Þetta var alveg meiriháttar skemmtilegt og mikil spenna í loftinu. Krakkarnir stóðu sig allir mjög vel og ég læt nokkrar myndir fylgja með.







fimmtudagur, 22. mars 2012

Flóttamenn

Hér rétt fyrir utan borgina eru flóttamannabúðir þar sem um 15 - 16000 flóttamenn búa. Flestir koma frá  löndum í sunnan- og austanverðri Afríku eins og Búrundi, Rúanda, Sómalíu og Kongó þar sem talið er að um helmingur þeirra komi frá. Margir hafa verið í mörg ár í búðunum, sumir eru m.a.s. þriðja kynslóð flóttamanna.

Mér finnst það með ólíkindum hve margir hér í Lilongwe hafa ekki minnstu hugmynd um þessar flóttamannabúðir sem eru í um 35 mínútna keyrslu frá borginni.

Það er ómögulegt að setja sig í spor þessa fólks. Þau eiga ekkert heimaland og komast ekkert. Það má geta þess að í fyrra fengu 79 flóttamenn úr þessum búðum búsetu í öðrum löndum, eins og Ástralíu og Kanada. 79 manns af meira en 15000 er sko ekki hátt hlutfall.

Einu sinni í mánuði fá íbúar úthlutaðum matarpakka. Í honum er t.d. sykur, olía og mjöl sem hægt er að búa til graut úr sem kallast nsíma, sem er meginuppistaða fæðu flestra innfæddra. Þar til nýverið fékk hver fullorðinn einstaklingur 12 kg af þessu mjöli. En þar sem alls staðar er verið að skera niður þá er núna úthlutað 7 kg í stað þessara 12. Af þessu þarf fólk að lifa allan mánuðinn.

Matarpakkinn inniheldur engar hreinlætisvörur og hafa margar konur lagt á það ráð að selja sig og stunda það sem kallast "survival sex" til að fá einhvern pening til að kaupa sér hreinlætisvörur. Eins selja sumir hluta matarpakkans síns til að geta keypt eitthvað annað sem ekki er í pakkanum.

Daglegt líf þessa fólks er enginn dans á rósum. Þau mega ekki stunda launaða vinnu og ekki yfirgefa búðirnar nema að fá til þess sérstakt leyfi. Það er erfitt að ímynda sér líf þar sem maður er gjörsamlega aðgerðarlaus dag eftir dag og vita það að dagurinn á morgun verður alveg eins, næsta vika verður einnig eins og næsti mánuður og m.a.s. næsta ár. Það hlýtur að vera afskaplega niðurdrepandi. Og að vita það að líf barnanna þinna verður nákvæmlega eins.

Ég er meðlimur í alþjóðlegum kvennasamtökum hér í Malawi, sem kallast IWAM, og fyrir einhverjum mánuðum hófum við að styðja við konur í þessum búðum. Það hafa verið haldin námskeið í bútasaumi í búðunum og voru handvaldar um 15 konur af fjölda umsækjenda. Við gáfum þeim efni til bútasaumsins á þau tvö námskeið sem búin eru. Þriðja námskeiðið hefst svo eftir páska og að sjálfsögðu gáfum við efnið í það. Konurnar læra að sauma barnateppi sem þær geta annað hvort nýtt fyrir sín eigin börn eða selt. Þessi námskeið hafa verið mjög vinsæl því þar gefst konum tækifæri á að læra einhverja handiðn og fyrir margar er þetta það eina sem þær hafa gert fyrir utan heimilisstörf. Það er von okkar í IWAM að konurnar geti selt teppin sín og fái þar með pening til að kaupa efni í ný teppi og þannig vindi þetta upp á sig.

Eins fékk IWAM fyrirspurn frá búðunum hvort við gætum stutt konur sem stundað hafa survival sex til að koma sér upp grænmetisgarði. Til þess að koma garðinum af stað vantaði þær öll verkfæri og fræ. Við gerðum þetta og það eru um 15 konur sem vinna í garðinum saman og þær halda einhverju fyrir sig og sína fjölskyldu og annað selja þær.

Í vikunni fékk ég tækifæri til að heimsækja þessar flóttamannabúðir og það var lífsreynsla sem er ómetanleg. Ég læt fylgja með nokkrar myndir sem ég tók í heimsókninni.

 Þetta er grænmetisgarðurinn þeirra. Þær eru mjög hreyknar of honum og mega sko alveg vera það.

Nokkrar konur stunda ýmsa handavinnu sem við svo reynum að selja fyrir þær. Ég náði ekki hvað þessi kona heitir né hvaðan hún er. Hún er að útbúa nokkurskonar platta undir heita potta. Það er verið að reyna að koma á viðskiptasambandi við einhver samtök í Bandaríkjunum og þá verða flottustu munirnir valdir og sendir út og seldir. Ef slíkt samband kemst á fyrir alvöru mun það að sjálfsögðu hafa mikið að segja fyrir konurnar því Bandaríkin eru stór markaður.

Þetta er Marie sem kemur frá Kongó. Hún sér um þær konur sem búa til hálsmen úr blaðaúrklippum. Þessi hálsmen eru mjög vinsæl meðal kvenna í IWAM enda eru þau flott. Marie býr í búðunum ásamt eiginmanni sínum og tveimur börnum.

Ég á örugglega eftir að blogga meira um þessar flóttamannabúðir síðar, því það er endalaust hægt að segja frá.

mánudagur, 19. mars 2012

Ráðgáta

Fyrir nokkrum vikum gaus upp mjög vond lykt (ekta kattahlandslykt) inni á baðherbergi og sökudólgurinn var kötturinn. Það verður að segjast eins og er að kisan var ekki í náðinni í nokkra daga :-) Svo loksins fór lyktin, alla vega hætti ég að finna hana, en Villi kvartaði enn.

Svo um daginn þurfti Villi að fara í vinnuferð niður á strönd og gisti á hóteli þar. Þar var þessi sama vonda lykt og bað hann því um að verða færður um herbergi. Það væri bara ekki nokkur möguleiki á að hann gæti sofið fyrir þessari lykt. Eitthvað er hann að tala um þessa lykt við starfsfólkið þar og kemur þá í ljós að þetta er sko ekki kattahlandslykt, nei nei. Heldur er þetta leðurblökulykt. Þannig að nú er ljóst að leðurblökur sofa undir þakinu hjá okkur og skilja eftir sig þessa líka "góðu" lykt. Nú er bara spurning hvernig við losnum við þær.

sunnudagur, 18. mars 2012

Veikindi

Rúnar hefur verið hundveikur undanfarna daga. Það byrjaði á miðvikudaginn, þá var hann eitthvað lélegur og var illt í hálsinum. Þá um kvöldið varð hann þokkalega slappur en við létum hann samt mæta í skólann á fimmtudagsmorgun. Þann dag var nefnilega hinn árlegi Alþjóðadagur skólans. Mikið húllumhæ er þennan dag sem byrjar á skrúðgöngu þar sem nemendur bera fána frá sínu heimalandi. Rúnar átti að vera fánaberi Íslands og við ákváðum að fara með hann í skólann til að vera í skrúðgöngunni en fara svo bara með hann heim eftir hana. Nemendur áttu að vera klæddir í föt í fánalitum síns lands og nú var úr vöndu að ráða með Rúnar. Eftir smá leit í fataskápnum hans fundust þessi líka fínu föt, íslenska landsliðstreyjan og stuttbuxur og íþróttasokkar sem settu punktinn yfir i-ið. Þetta voru íslensku sokkarnir sem hann fékk í jólagjöf frá frændum sínum í Eyjabakkanum. Íslenski fáninn er utan á leggnum á þeim. Svo bar hann íslenska fánann.

Hann tók sig mjög vel út drengurinn, það verður að segjast eins og er :-)

En strax eftir skrúðgönguna fórum við með hann heim því hann var svo slappur. Svo bara versnar honum allan daginn og seinni partinn er hann bara í hálfgerðu móki inni í stofu. Ég ákvað að fara með hann á heilsugæslustöð sem er bara hérna í næsta húsi. Þá kom í ljós að hann er með hálskyrtlabólgu og var settur á pensilín.

Á föstudaginn fór hitinn upp í tæpa 40 gráður og við gáfum honum líka reglulega hitastillandi. Svo loks í gær fór honum að skána og er orðinn bara góður í dag, sunnudag.


laugardagur, 3. mars 2012

Smá mistök

Ég tók mig til áðan og kláraði að setja saman framhliðina á bútateppinu mínu. Munstrið kemur vel út og efnið er gert úr skyrtuafgöngum :-) Ég lagði teppið á gólfið inni í herbergi og var að taka myndir af því þegar Rúnar kemur og athugar hvað ég er að gera. Jú jú honum þótti teppið alveg flott "en mamma, það eru mistök í því". Ha??? Ég hafði ekki tekið eftir neinu en það tók hann bara andartak að reka augun í það.
Í næstöftustu röðinni snýr einn ferningurinn vitlaust, þ.e. dökkgræni og ljósgræni búturinn lengst til vinstri. Arrg, mín varð sko ekki glöð. Nú þarf ég að rekja aðeins upp og laga þetta. Svo þarf ég að finna efni til að hafa sem bakhlið á teppinu.

Ég veit svo sem ekki hvað ég ætla að gera við þetta teppi. Þetta eru ekki litir sem ég er vön að nota. En það má sjálfsagt nota það í eitthvað :-) Annars er Rúnar búinn að panta sér svona teppi og litirnir sem hann valdi eru dökkgrænn, gulur, rauður og brún bakhlið :-) Og stærðin?? jú hann vill að teppið sé 200 cm x 202 cm. Takk fyrir.


Útsaumur

Ég tók myndir af útsaumsmyndinni sem ég kláraði um daginn en þær komu ekki nógu vel út, þær eru ekki nógu skarpar. En ég læt þær samt fylgja með. Ég ákvað að láta ramma myndina inn og fór ég með hana í innrömmun um daginn. Þetta tekur sjálfsagt einhvern góðan tíma því það þarf að senda hana til Blantyre þar sem hún verður römmuð inn. Ég krosslegg fingur og vona að myndin verði ekki skítug áður en hún verður innrömmuð :-) Ég er mjög hrifin af þessari mynd og afríska kellingin mín kom rosalega vel út, en svo er ekkert víst að ég verði eins hrifin þegar hún verður komin í ramma.


Ég hendi líka inn mynd af krosssaumsmyndinni sem ég var að ljúka við. Þetta er þriðja Íslandsmyndin sem ég geri. Mér finnst mjög gaman að sauma þessa mynd af klakanum og munstrið er flott.