Afmælisgjöf

Ég bara verð að sýna ykkur hvað hún Dagmar Ýr gaf mér í afmælisgjöf um daginn. Þetta er ótrúlega flott hjá henni og ég í skýjunum með gjöfina. Það er bara spurning hvort ég tími að nota þær :-) Þetta eru sex stykki diskamottur útsaumaðar í harðangur - geggjað flottar.

Annað námskeið

Þegar keilunámskeiðinu hjá Rúnari Atla lauk, tók við annað námskeið. Nú er það reið- og leikjanámskeið. Á morgnana er hann í hestastússi og eftir hádegi er hann á leikjanámskeiði. Hann var á svona námskeiðum í fyrra og skemmti sér svona vel að það var ákveðið að leyfa honum að fara aftur núna. Hann er m.a.s. skráður á tvö svona námskeið þetta sumarið.

Á leiðinni heim í gær af námskeiðinu bað hann um að fá að kíkja í búðina "Hestar og menn" því hann vildi skoða reiðbuxur. Jú jú, það var auðsótt og við beint þangað. Hann var ekki lengi að finna sér þessar fínu reiðbuxur og mamman lét undan og splæsti á hann. Menn verða jú að vera rétt græjaðir í hestastússinu :-)

Keila

Rúnar byrjaði fyrstu vikuna sína á Íslandi á að skella sér á keilunámskeið og skemmti sér mjög vel. Hann lærði hvað fella og feykja er og náði víst oft báðum. Námskeiðið var nú samt aðeins meira en bara keila, t.d. var farið í Nauthólsvík, Sundhöllina og þau voru mikið í útileikjum. Þetta var mjög gott námskeið og mælum við Rúnar eindregið með því.

Síðasta daginn var svo grillveisla og allir fengu viðurkenningarskjal og bol. Bolurinn var flottur en það setti smá strik í reikninginn hjá Rúnari að hann er merktur ÍR. Þeir sem til þekkja vita jú að Leiknir og ÍR eru erkifjendur og þar sem Rúnar er dyggur Leiknismaður þá finnst honum nú ekki auðvelt að vera í þessum bol. En þar sem keilunámskeiðið var víst á vegum ÍR þá er skiljanlegt að þeir merki sér bolina.

Það eina góða við bolinn er að þetta stendur á bakinu :-)

Karate

Um síðustu helgi var haldið beltapróf í karate og það er alltaf jafn spennandi og skemmtilegt :-) Rúnar náði gula beltinu og var mjög ánægður. Ég fann enga góða mynda af honum með það belti, en hér eru nokkrar sem teknar voru á prófdaginn.

 Allir sestir niður og bíða spenntir eftir að byrja.

 Það er að sjálfsögðu byrjað á upphitun. Það væri nú gaman að geta þetta :-)

Hér eru svo vinirnir, Tadiwa frá Zimbabwe, Rúnar frá Íslandi og Malko frá Frakklandi. Þetta er alþjóðlegt lið enda í alþjóðaskóla :-)

Útsaumur

Um daginn kláraði ég útsaumsmyndina mína og fór með hana í innrömmun. Ég naut þess virkilega að sauma þessa mynd og er mjög ánægð með útkomuna. Ég hef oft átt í erfiðleikum með að velja ramma því þó mér finnist ramminn fallegur þegar ég er að velja þá er ekki þar með sagt að hann njóti sín utan um myndina. Mér finnst þetta alltaf voðalegt happa og glappa. En útkoman með þessa blómamynd er fín og litirnir njóta sín vel. Þetta sést betur ef þið veljið myndina og klikkið á hana.

Nú er ég á fullu að skoða munstur og ákveða hvað ég ætla að gera næst. Ég er reyndar með ákveðnar hugmyndir að nokkrum útsaumsmyndum og bíð spennt eftir að komast til Íslands til að kaupa efni í þær.

Sóun

Námið í skólanum hans Rúnars Atla er ekki þetta hefðbundna sem ég þekki, t.d. sér stærðfræðitími, enskutími og þess háttar. Heldur er valið eitthað ákveðið efni og inn í það er öllum þessum fögum blandað. Þetta kallast "cycle" eða hringur. Það sem af er þessu ári hafa verið fimm slíkir hringir, t.d. arkitektúr, framleiðsla, vatn og ferðalög. Þau nota nokkrar vikur í hvert efni og tengja öll önnur fög inn í. Þetta hefur flækst soldið fyrir mér en ég er að ná þessu núna. Mér fannst t.a.m. mjög skrítið að geta ekki fengið að skoða stærðfræðibókina hans, nú eða enskubókina. Það eru engar slíkar bækur.

En alla vega, þá finnst Rúnari mjög gaman að þessum hringjum, og þessi námsaðferð hentar honum greinilega vel. Þegar þau eru með einhvern ákveðinn "hring" þá læra þau mikið um það ákveðna efni. T.d. arkitektúrinn, það var alveg með ólíkindum hvað þau lærðu mikið um það efni.

Þau voru að ljúka við vantshringinn og það var greinilega farið mikið í það hvað takmarkað er af hreinu vatni í heiminum og ekki megi sóa því. Rúnar hefur tekið þessu mjög alvarlega og það hefur haft áhrif á heimilislífið, það er nú ekki hægt að segja annað. Það liggur við að ég sé sökuð um að sóa vatni ef ég voga mér að skrúfa frá krana. Hann virðist nýta sér þetta út í það ýtrasta, t.d. þegar hann á að þvo sér um hendur. Þá tekur slíkur þvottur mjöööög stuttan tíma því hann er að spara vatnið :-)  Svo þegar ég sagði honum að hann eigi að fara í bað því hann verði hreinlega að liggja í bleyti til að losa allan skítinn eftir útiveruna. Nei takk. "Sko mamma, að fara í bað eyðir helmingi meira vatni heldur en að fara í sturtu, svo ég fer bara í sturtu."

Um daginn kom hann heim með einhverja bókina sem hann var að vinna í varðandi vatnshringinn og leyfði okkur að lesa. Þar hafði hann skrifað "skammarsögu" um bílaþvott hjá okkur. Á þessum bæ er bílinn þveginn með því að nota vantsslöngu. Þetta finnst Rúnari alveg sérlega slæmt. Það á að nota vatnsfötu og tusku. Ekki vatnsslöngu sem rennur endalaust úr.

Sveiflukóngurinn minn

Rúnari finnst alveg ótrúlega gaman í golfi. Hann á það til að æfa sig úti í garði og í gær tók hann sig til, og bauð mér út í garð að horfa á sig - sem ég og gerði. Hann er voða duglegur en þar sem hann átti bara eina golfkúlu þá var þetta nú frekar slöpp æfing. Því hann varð alltaf að hlaupa á eftir kúlunni eftir hvert einasta skot. Stundum gekk illa að finna kúluna en við röltum þá um og enduðum nú alltaf með að sjá skína í eitthvað hvítt :-) Þar til að lokum þegar hún lenti í grænmetisgarðinum, þá týndist hún og æfingu þar með lokið í bili.

Við urðum því að skjótast út í búð í morgun til að kaupa fleiri golfkúlur svo hann gæti haldið æfingum áfram í páskafríinu. Einnig þurfti hann að kaupa sér "brush - tee" og fleiri venjuleg "tee". Ég hef ekki hugmynd hvað þetta tee heitir á íslensku en þessu er stungið ofan í grasið og kúlan sett þar ofan á. Þetta brush tee er eins, nema það eru burstahár sem boltinn stendur ofan á. Þetta á að vera eitthvað voðalega flott en ekki hef ég vit á þessu.

Nú er hann búinn að vera úti í garði að æfa sig í nálægt tvo tíma og er m.a.s. farinn að kenna verðinum að spila golf. Þeir virðast skemmta sér ágætlega yfir þessu saman :-) Ég bara krosslegg bara fingur og vona að engin kúla fari í gluggana með tilheyrandi brothljóðum. En af og til heyri ég mikla skelli þegar kúlan lendir "óvart" í húsinu. Áðan kom hann inn til að tilkynna mér að ein kúlan fór yfir í næsta garð. Vonandi bara að hann slasi ekki einhvern nágrannanna okkar með þessu brölti sínu.

Fyrst er að velja sér rétta kylfu

 Svo er að setja kúluna ofan á tee-ið

 Svo eru það flottar sveiflur :-)